Hátíðarhljómar við áramót 31.12.12 kl. 17.00

Síðustu tónleikar ársins 2012 hér á Íslandi verða að venju í Hallgrímskirkju á gamlársdag, 31. desember, kl. 17:00 Það er í 20. sinn að Listvinafélag Hallgrímskirkju býður upp á tónleika undir yfirskriftinni Hátíðarhljómar við áramót, en lúðraþytur og trumbursláttur hafa um aldir tengst hátíðum. Fyrirmyndir þess má finna í elstu sálmabók kirkjunnar, Saltaranum, þar sem Drottinn er lofaður með bumbum og málmgjöllum. Lúðraköll – fanfarar tengjast bæði konunglegum lífvörðum og herkvaðningum af ýmsum toga og í kirkjunni hafa þessi hljóðfæri meðal annars verið notuð þegar upprrisu Krists er fagnað á páskum og með dýrðarsöng englanna á Betlehemsvöllum.

Að þessu sinni eru það trompetleikararnir Ásgeir H. Steingrímsson, Eiríkur Örn Pálsson og Einar St. Jónsson, pákuleikarinn Frank Aarnink og orgelleikarinn Björn Steinar Sólbergsson sem leika saman verk sem flest eiga uppruna sinn á barokktímabilinu. Á efnisskránni eru fanfarar og hátíðleg tónlist. Meðal þeirra eru Forleikur að Te Deum eftir Charpentier (EBU lagið) og Forleikur að Flugeldasvítunni eftir Händel. Þá leikur Björn Steinar hina þekktu Tokkötu sem er lokakaflinn í 5. orgelsinfóníu Widors. Þá má ekki gleyma hinu fræga Adagio eftir Albinoni sem Ítalinn Giazotto umritaði.

Miðasala er í Hallgrímskirkju, s. 510 1000, opið kl. 9:00 - 17:00.
Miðaverð er 3000/2500 kr en 1500 kr fyrir félaga í Listvinafélagi Hallgrímskirkju.

http://www.facebook.com/events/498136223542149/