Hátíðartónlist fyrir kór og orgel. 21. apríl.

Næsta sunnudag 21. apríl verða hátíðatónleikar í Hallgrímskirkju í tilefni af endurnýjun Klais-orgels kirkjunnar, sem lauk nú fyrir páskana.

Mótettukór Hallgrímskirkju og Björn Steinar Sólbergsson organisti flytja hátíðatónlist fyrir kór og orgel.

Á tónleikunum verða flutt verk eftir Hafliða Hallgrímsson, Louis Vierne og William Walton.

Burðarás efnisskrárinnar er Hátíðarmessa fyrir tvö orgel og kór eftir franska tónskáldið Louis Vierne, sem frumflutt var í kirkjunni St. Sulpice í París á páskadag árið 1900.

Hin verkin eru Lofið Guð í hans helgidóm fyrir kór, trompet, hörpu slagverk og orgel eftir Hafliða Hallgrímsson frá 1996/2012 og Coronation Te Deum eftir William Walton frá 1953. Verk Waltons var samið fyrir krýningu Elísabetar Englandsdrottningar og frumflutt í Westminster kirkjunni í London við það tækifæri.

Auk þess leikur Björn Steinar Carillon de Westminster og Impromtu, vinsælar orgelfantasíur eftir Vierne.

Með kórnum koma fram Lenka Máteóvá organisti, Ásgeir H. Steingrímsson trompetleikari, Elísabet Waage hörpuleikari og Frank Aarnink slagverk, auk Björns Steinars.  Stjórnandi er Hörður Áskelsson.

Miðasala fer fram í Hallgrímskirkju, s. 510 1000 og er miðaverð 3000 kr. en listvinir fá 50% afslátt og miðann á 1500 kr.