Hádegistónleikar í Hallgrímskirkju 12. febrúar kl. 12:00 - 13:00

Listvinafélag Hallgrímskirkju stendur fyrir mánaðarlegum hádegistónleikum þetta starfsárið.
Í þessari tónleikarröð mun Björn Steinar Sólbergsson, organisti Hallgrímskirkju m.a. flytja öll verk úr Orgelbüchlein eftir Johann Sebastian Bach í tengslum við kirkjuárið og að þessu sinni bera þeir yfirskriftina „Áramót og Þrettándinn“.
Þá mun Björn Steinar einnig flytja Brúðkaupið í Kana úr fjórum bíblíudönsum eftir tékkneska tónskáldið Petr Eben.

Sr.Jón Dalbú Hróbjartsson mun flytja ávarp og lesa úr ritningunni.

Aðgangur er ókeypis en tekið er við frjálsum framlögum við kirkjudyr til styrktar Listvinafélagi Hallgrímskirkju.

Ég held glaður jól

Kristinn Sigmundsson
Mótettukór Hallgrímskirkju
Björn Steinar Sólbergsson orgel
Stjórnandi: Hörður Áskelsson

Miðvikudagur 29. desember  kl. 20:00
Fimmtudagur 30. desember  kl. 17:00
Fimmtudagur 30. desember  kl. 20:00

 

 

 

 
Jólatónleikar Mótettukórsins hafa í nærri þrjá áratugi verið fastur liður í aðventubyrjun í Hallgrímskirkju. Að þessu sinni verða tónleikar kórsins milli jóla og nýárs.  Kristinn Sigmundsson óperusöngvari syngur með kórnum meðal annars lög sem hann flutti ásamt kórnum á metsöluplötunni „Ég held glaður jól“ frá árinu 1985.   Á efnisskrá verða jólasálmar, jólasöngvar og mótettur eftir Sweelinck, Hassler, Praetorius, Cornelius, Rutter, Scheidt, Mathias, Sigurð Flosason, Sigurð Sævarsson og fleiri.
Vegna tímasetningar tónleikanna gefst einstakt tækifæri á að gefa miða á tónleikana í jólagjöf og eru falleg gjafabréf með umslagi í boði í Hallgrímskirkju fyrir þá sem það vilja.

Miðaverð 3.500 / 2.500 fyrir listvini
Miðasala í Hallgrímskirkju og á Midi.is

Hátíð fer að höndum ein

 Aðventuandi með tónlist og heitu súkkulaði í Hallgrímskirkju á laugardaginn 11. desember kl. 14.00 - 17.00

Listvinafélag Hallgrímskirkju og tónlistarfólk Hallgrímskirkju bjóða til tónlistarveislu á laugardaginn. Í boði verður samfelld aðventu- og jóladagskrá með kórsöng og orgeltónlist þar semkirkjugestir fá einnig að syngja með í þekktum söngvum. Fram koma Drengjakór Reykjavíkur í Hallgrímskirkju undir stjórn Friðriks S. Kristinssonar, Mótettukór Hallgrímskirkju og Schola cantorum undir stjórn Harðar Áskelssonar. Báðir organistar kirkjunnar, Björn Steinar Sólbergsson og Hörður Áskelsson leika aðventu- og jólatónlist á Klais-orgelið. Aðgangur er kr. 1000 /ókeypis fyrir yngri en 16 ára. Heitt súkkulaði og meðlæti verður selt á vægu verði til styrktar Listvinafélagi Hallgrímskirkju.

Dagskrá: 

14.00 - Schola cantorum flytur aðventu- og Maríusöngva. Stjórnandi er Hörður Áskelsson.

14.30 - Björn Steinar Sólbergsson leikur aðventu- og jólatónlist eftir Johann Sebastian Bach á Klais-orgelið.

15.00 - Drengjakór Reykjavíkur í Hallgrímskirkju syngur jólalög. Stjórnandi: Friðrik S. Kristinsson, undirleikari: Lenka Mátéová.

15.30 - Hörður Áskelsson leikur jólatónlist eftir frönsk tónskáld á Klais-orgelið.

16.00 - Mótettukór Hallgrímskirkju syngur aðventu- og jólalög. Stjórnandi: Hörður Áskelsson.

16.30 - Björn Steinar Sólbergsson leikur franska jólatónlist á Klais-orgelið.

Hádegistónleikar 4. desember 2010

Hádegistónleikar á aðventu Hallgrímskirkju. Björn Steinar Sólbergsson hefur heildarflutning á Orgelbüchlein jóla- og aðventuhlutann, eftir J.S.Bach. Einnig flytur hann þriðja kaflann úr 2. Orgelsinfóníu eftir C.M.Widor. Laugardaginn 4. desember 2010 kl. 12.00. Aðgangur ókeypis en tekið er við frjálsum framlögum til styrkar starfi Listvinafélags Hallgrímskirkju. Allir velkomnir.

Björn Steinar í Þýskalandi

Björn Steinar heldur orgeltónleika í Klausturkirkjunni Maria-Laach í Rheinland Palatine héraði í Þýskalandi, föstudaginn 24. september 2010 kl. 20.00 að staðartíma. Á efnisskránni verða rómantísk orgelverk eftir Pál Ísólfsson, Þorkel Sigurbjörnsson, Mendelssohn, Cesar Franck og Gigout. sbr. : http://www.maria-laach.de/konzerte.php

Björn byrjar Orgelsumarið 2010

Tónleikaröðin Alþjóðlegt Orgelsumar 2010 í Hallgrímskirkju, sem haldin er undir merkjum Listvinafélags Hallgrímskirkju, hefst n.k. laugardag með hádegistónleikum Björns Steinars Sólbergssonar, organista við Hallgrímskirkju. Þetta er 18. sumarið sem orgelhátíð er haldin í Hallgrímskirkju yfir sumartímann, en tónleikaröðina stofnaði Hörður Áskelsson organisti við Hallgrímskirkju sumarið eftir að Klais-orgel kirkjunnar var vígt árið 1992. Vegna mikillar eftirspurnar ferðamanna eftir tónleikum í kirkjunni byrjar tónleikatímabilið í ár fyrr en áður með hádegistónleikum á laugardögum allan júnímánuð og sunnudagstónleikum frá 27. júní.

Upphafstónleikar Alþjóðlega orgelsumarsins laugardaginn 5. júní kl. 12 eru í höndum Björns Steinars Sólbergssonar, organista við Hallgrímskirkju og skólastjóra Tónskóla Þjóðkirkjunnar. Björn Steinar stundaði framhaldsnám á Ítalíu hjá James E. Göettsche og í Frakklandi hjá Susan Landale. Hann starfaði sem organisti við Akureyrarkirkju í 20 ár þar sem hann vann markvisst að uppbyggingu tónlistarstarfs. Björn Steinar hefur haldið fjölda einleikstónleika hér heima og erlendis og leikið einleik m.a. með Sinfóníuhljómsveit Íslands. Á efnisskránni eru verk eftir íslensk og frönsk tónskáld ásamt Pièce d’orgue eftir J.S. Bach.

Allar frekari upplýsingar má finna á heimasíðu Listavinafélags Hallgrímskirkju, www.listvinafelag.is

Skrár tengdar þessari bloggfærslu:

• Alþjóðlegt orgelsumar/veggspjald2010

Föstutónleikaröðin Leyndardómur trúarinnar í Grindavíkurkirkju

Næstu miðvikudaga verður Föstutónleikaröðin Leyndardómur trúarinnar" í Grindavíkurkirkju.

Um er að ræða sex tónleika á miðvikudagskvöldum kl. 20 dagana 17.febrúar, 24. febrúar, 3. mars, 10. mars, 17. mars og 24. mars og aðgangseyrir er 1.000 kr.

Björn Steinar Sólbergsson leikur þann 24. mars verk eftir Bach, Buxtehude, Mendelsohn-Bartholdy og Pál Ísólfsson.

Áhersla er lögð á að tengja tónlistina við trúarlegt inntak föstutímans auk þess sem einn passíusálmur Hallgríms Péturssonar verður tekinn fyrir á hverjum tónleikum.

 

Skrár tengdar þessari bloggfærslu:

• veggspjald

Orgeltónleikar sunnudagskvöld

Sunnudagskvöldið 20. september kl. 20 heldur Björn Steinar Sólbergsson tónleika á Noack orgelið í Langholtskirkju í tilefni þess að 10 ár eru liðin frá því að orgelið kom í kirkjuna.

http://www.kirkjan.is/langholtskirkja/

Langholtskirkja,
Sólheimum 13 - 15,
104 Reykjavík
Sími 520 1300.     

Aþjóðleg Orgelhátíð 2009

Alþjóðleg Orgelhátíð 2009

 

Alþjóðlegt orgelsumar í Hallgrímskirkju er nú haldið í 17. sinn. Tónleikaröðin er haldin undir merkjum Listvinafélags Hallgrímskirkju og hefur verið árlegur viðburður frá því að Klais-orgel kirkjunnar var vígt 1992.

Orgelhátíðin hefst sunnudaginn 28. júní með opnunartónleikum Björns Steinars Sólbergssonar, organista í Hallgrímskirkju

Aðgangseyrir er kr. 1.500.

Alþjóðlegt orgelsumar og Klais-orgel Hallgrímskirkju hafa ávallt laðað að sér framúrskarandi listamenn og svo er einnig í sumar. Organista, sem koma víða að og flytja okkur fjölbreytta orgeltónlist, bæði frá heimalandi sínu og einnig þekktar orgelperlur. Meðal flytjenda í ár má nefna Andreas Sieling, dómorganista í Berlín, Roger Sayer, dómorganista í Rochester í Englandi og Susan Landale sem er meðal virtustu konsertorganista í heiminum í dag.

Að þessu sinni er tónskáldið Felix Mendelssohn-Bartholdy í öndvegi. Mendelssohn fæddist í Hamborg í Þýskalandi 1809 og eru því 200 ár liðin frá fæðingu hans og er þess minnst víða um heim. Í Hallgrímskirkju verða öll helstu verk hans fyrir orgel flutt á Alþjóðlega orgelsumrinu 2009.

Tónleikarnir verða svo haldnir á hverjum sunnudegi kl. 17 til og með 16. ágúst. Þess má geta að organistar Alþjóðlega orgelsumarsins taka þátt í helgihaldinu í Hallgrímskirkju með því að leika eftirspil í messu sunnudagsins kl. 11.00.